Tuesday, August 15, 2017

අමරණීයන්ගේ ගෘහයේදී ඩෙනේරිස් දකින දර්ශන| Dany's visions in House of the Undying


ටීවී සීරීස් එකේ දෙවනි සීසන් එකේ නම් ඩැනී අමරණීයන්ගේ ගෘහයට යන්නේ එකෙ ඇතුලෙ හොරකම් කරපු මකරු හංගලා තියන නිසා. පොතේ නං ඩැනී ඕක ඇතුලට යන්නෙ අමරණීයන්ගේ දැනුම ලබා ගන්න. අමරණීයන්ගේ ගෘහයේදී ඩැනීට විවිධ දර්ශන පේන්න ගන්නවා. හරියටම කිව්වොත් දර්ශන 19ක්.
මේ දර්ශන වලින් අතීතයේ සිද්ධ වුන දේවල්, අනාගතයේ වෙන්න තියෙන දේවල් නිරූපණය වෙනවා. හැබැයි අනාගතයේ වෙන්න තියන දේවල් ඒ ආකාරයෙන්ම සිද්ධ නොවෙන්න පුළුවන් ( උදාහරණ ඉදිරියට කියවනකොට තියේවි)

1) ඩැනි දකින පළවෙනි දේ තමයි නිරුවත් කාන්තාවකගේ සිරුරක් කුඩා මිනිසුන් හතර දෙනෙක් විසින් ඇගේ මස් කඩා කමින් ඇයව දූෂණය කරන දර්ශනයක්


[මේ දර්ශනයේ කාන්තාව වෙස්ටරෝස් සදහා උපමාවක් ලෙසත් කුඩා මිනිසුන් හතර දෙනා ඒ වන විට යුධ වැදී සිටි රජවරු හතරදෙනා ලෙසත් නිරූපණය වෙනවා (මේ වෙනකොට රෙන්ලි මැරිලා. ඉතිරි හතරයි)]

2)ඊළගට ඩැනී දකින්නේ මළසිරුරු පිරුණ භෝජන සංග්‍රහයක්. පු‍ටු මේස කෝප්ප පිගන් පෙරළුන කාමරයක්. කාමරයේ සිංහාසනයක් මත වෘක හිසක් තියෙන කෙනෙක් යකඩ ඔ‍ටුන්නක් දමාගෙන ඉන්න දර්ශනයක්

[මේකෙන් නිරූපණය වෙන්නෙ රතු මංගල්‍යය (Red wedding) හෙවත් ෆ්‍රේ බලකො‍ටුවේදී ස්ටාර්ක්ලා සමූල ඝාතනය වුන සිද්ධිය. වෘක හිසක් තියන යකඩ ඔ‍ටුන්නක් දාගෙන ඉන්න කෙනා රොබ් ස්ටාර්ක්. මේ දර්ශනයේ විශේෂත්වය තමයි ඊළග පොතේ වෙන්න තියන සිද්ධියක් නිවරදිව දර්ශනය මගින් පෙන්වීම]


3) තුන්වනි දර්ශනියෙන් පෙන්වන්නෙ ඩැනී සහ විසේරිස් හැදී වැඩුන බ්‍රාවෝස් වල පිහිටලා තිබුන රතු දොරක් සහිත ගෙය.



4) ඊළගට මකර හිස් කබල් පිරුණ ශාලාවක උල් ක‍ටු තියන සිංහාසනයක වාඩි වෙලා ඉන්න මහළු මිනිහෙක්ගේ දර්ශනයක්. මේ මහළු මිනිහා "එයා අළු සහ පිච්චුන මස් වල රජා වෙච්චාවෙ" කියලා කෑගහනවා.
[මේකෙන් පැහැදිලිව නිරූපණය වෙන්නේ ඩැනීගෙ තාත්තා හෙවත් මෑඩ් කිංග් මුළු අගනුවරම ගිනිබත් කරන්න අණ දෙන සිද්ධිය]



5) පස්වෙනි දර්ශනය විදිහට ඩැනී දකින්නෙ තමාගේ සහෝදරයා විසේරිස්ගෙ කොණ්ඩය තියන, එයාට වඩා උස කෙනෙක් සහ අලුත උපන් දරුවෙක් වඩාගෙන ඉන්න කාන්තාවයකගෙ දර්ශනයක්.
"ඒගෝන්" "රජෙකුට ගැළපෙන නමක්" උස සුදුපාට කොණ්ඩය තියන කෙනා කියනවා.

"ළමයා වෙනුවෙන් ඔයා ගීතයක් ලියනවද" ගෑණු කෙනා අහනවා.

"එයාට ගීතයක් තියෙනවා. ඔහු තමයි පොරොන්දු වුන කුමාරයා (The Prince That Was Promised), හිම සහ ගිනි තමයි ඔහුගේ ගීතය"

ඔහු අහක බලනවා "ඒත් මකරාට හිස් තුනක් තියනවා, තව කෙනෙක් අඩුයි" ඔහු මුමුණනවා

ඔහු තමන්ගෙ වීණාවෙන් දුක්බර ගීතයක් වාදනය කරනවා

[ මේ දර්ශනයේ විසේරිස්ගෙ කොණ්ඩය තියන උස කෙනා ඩැනීගේ ලොකු අයියා හෙවත් රේගාර් ටාගේරියන්. කාන්තාව එලියා මාර්ටෙල්, අලුත උපන් ළමයා රේගාර්ගෙ දෙවනි ළමයා හෙවත් ඒගෝන්. රේගාර් ගොඩක් අනාගත වාක්‍ය විශ්වාස කරපු කෙනෙක්. ලෝකය බේර ගන්න එන පොරොන්දු වුන කුමාරයා/ මකර ත්‍රිත්වය වගේ දේවල් රේගාර් විශ්වාස කලා. රේගාර් හිතුවෙ තමන්ගෙ ළමයින් තුන් දෙනා මකර ත්‍රිත්වය සහ පොරොන්දු වුන කුමාරයා බවට පත් වෙනවා කියලයි. ]


6) හයවෙනි එක දර්ශනයක් කිව්වට මේක අමරණීයන් (undying)ඩැනීට කරන ප්‍රකාශයක්. ප්‍රකාශය මෙහෙමයි
ඔබ තෙවරක් ගිනි දැල්විය යුතුය
වරක් ජීවිතයට
වරක් මරණයට
වරක් ආදරයට
ඔබ තෙවරක් නැංවිය (mount)යුතුය
වරක් සයනයට (ඇඳට)
වරක් භීතියට
වරක් ආදරයට
ඔබ තෙවරක් පාවා දීමට ලක්වේවි
වරක් රුධිරයට
වරක් රත්‍රං වලට
වරක් ආදරයට

ජීවිතය උදෙසා ගිනි දැල්වීම සිදු වෙන්නෙ මකර බිත්තර, යක්දෙස්සිය සහ කාල් ඩ්‍රෝගෝ ගේ මෘත සිරුරට ගිනි දල්වා, එම ගිනි මැලයට ඩැනී ඇතුලු වීමෙන්. මේ නිසා මකරු උපත ලබනවා. ජීවිතය උදෙසා ගිනි දැල්වුයේ එහෙමයි
මරණය වෙනුවෙන් ගිනි දැල්වූවේ ඩොත්‍රාකි ශුද්ධ භූමියේ ඩොෂ් කලීන් පන්සලට ගිනි දල්වා සියලුම කාල් වරු මරණයට පත් කිරීමෙන්
ඩැනී තවම ආදරය වෙනුවෙන් ගිනි දල්වා නෑ. ඒ කියන්නෙ ඉදිරියේදී තවත් ගිනි දැල්වීමක් බලාපොරොත්තු වෙන්න පුළුවන්. මේ ගිනි දැල්වීම බොහෝ විට ජොන් වෙනුවෙන් කරන්න පුලුවන්
නැංවීම (mount)කියන වචනේ තේරුම බයිසිකලයක්/ සතෙක් උඩ නගිනවා කියන අදහසයි.
සයනයට නැගපු සතා ඩ්‍රෝගෝ තෑගි කල රිදී අශ්වයා
භීතිය පතුරවන්න නැගපු සතා මකරා ඩ්‍රෝගෝන්
ආදරය වෙනුවෙන් තාම සතෙකු පිට නැගලා නෑ. බොහෝ විට මේක ජොන්ගෙ ඝෝර වෘකයා (dire wolf)වෙන්න පුළුවන්

ඊට අමතරව mount/ ride කියන්නෙ ලිංගික සහකරු වෙන්න පුලුවන්. එතකොට

සයනයට කාල් ඩ්‍රෝගො

භීතියට හිස්ඩා/ ඩාරියෝ නහාරිස්
ආදරයට තවම නැත


රුධිර පාවා දීම වෙන්නෙ ඩ්‍රෝගෝට වෙදකම් කරන්න ගෙනාව යක්දෙස්සිය ලේ මැජික් වලින් ඩැනීගේ නූපන් ළමයා මරා කාල් ඩ්‍රෝගෝගේ මනස විනාශ කිරීමෙන්.
රත්‍රං වෙනුවෙන් පාවා දීම සිදුවන්නෙ ජෝරා මෝමන්ට් ඩැනී ගැන රොබට් බැරෑතියන්ට ඔත්තු බැලීමෙන්
ආදරය වෙනුවෙන් තවම ඩැනී පාවා දීමකට ලක්ව නැත. එම පාවා දීම බලාපොරොත්තු වෙන්න පුළුවන්





7) හත්වෙනි දර්ශනය විදිහට ඩැනී දකින්නේ රත්කල රන් ඔළුවට වක් කිරීමෙන් විසේරිස් මරා දැමෙන සිද්ධිය




8) ඊළගට උස දුඹුරු තඹවන් සමක් ඇති රිදී පැහැති හිස කෙස් සහිත පුද්ගලයෙක් ගිනිගෙන දැවෙන අශ්වයෙක් සහිත ධජයක් ඉදිරියෙන් ඉන්න දර්ශනයක්. ඔහුගේ පි‍ටුපසින් ගිනිබත් කරන ලද නගරයක් දිස්වෙනවා

[මේ ඩැනීගේ නූපන් පුත්‍රයා හෙවත් ලොව ජය ගන්නා අසරුවා. ඩොත්‍රාකි දුඹුරු සමත් ටාගේරියන් රිදී හිස කෙසුත් ඔහු සතු වෙනවා. ගිනිගෙන දැවෙන අශ්වයා ඔහුගේ සංඛේතයයි. මෙය සැබෑ නොවෙන අනාගත දර්ශනයකට උදාහරණයක් ]


9] පණ අදින කුමාරයාගෙ පපුවෙන් පද්මරාග මැණිකැට රුධිරය මෙන් විසිවෙනවා. දණහිස තෙක් ගැඹුරු වතුරේ ගිලෙමින් අවසන් හුස්ම හෙලන ගමන් ඔහු ගැහැණියකගේ නම මුමුණනවා

[මේ ත්‍රිශූලයේ සටනේදි (battle of Trident) රොබට් බැරෑතියන්ගෙන් පහර කා පණ අදින රේගාර් ටාගේරියන් ඉන්න දර්ශනයක්. රේගාර්ගේ ශරීර ආවරණයේ පද්මරාග මැණිකැට විසිරී යනවා. ඔහු අන්තිමට මුමුණන්නේ ඔහුගේ බිරිදගේ නම එලියා මාර්ටෙල්ද එසේ නැත්නම් ලියානා ස්ටාර්ක්ගේ නමද?]


10) දැන් ඩැනී දකින්නේ රෙදි වලින් නිමවපු පොලු වලින් උස්සන් ඉන්න රූකඩ මකරෙකුගේ දර්ශනයක්

[මේක තේරුම් කරන්න සංකීර්ණ කතාවක් කියන්න වෙනවා. මේ සිද්ධිය ටීවී සීරීස් එකේ නෑ. රොබට්ගේ කැ‍රැල්ල වෙලාවේ ලැනිස්ටර් හමුදාව අගනුවර ආක්‍රමණය කරනකොට වේරිස්, රේගාර්ගේ පුතා එගෝන් වෙන ළමයෙකුට මාරු කරනවා. ඒගෝන් බේරෙනවා. වේරිස් ඔහුව එසෝස් වලට යවනවා. මේ කතාව තමයි වේරිස් කියන්නෙ. පොතේදි මේ එගෝන් ගෝල්ඩන් කම්පණි කියන කුලී හමුදාව එක්ක ඇවිත් වේරිස්ගෙ උදව්වෙන් අගනුවර ආක්‍රමණය කරන්න සැලසුම් කරනවා
හැබැයි වේරිස් ඒගෝන් ගැන කියන කතාව විශ්වාස කරන්න බෑ කියලා තමයි බොහෝ ෆෑන්ස්ලා හිතන්නෙ.ඒ වෙනුවට ෆෑන්ස්ලා තියරියක් නිර්මාණය කරනවා. ඒ තියරිය තමයි පහලින් තියෙන්නෙ.
වේරිස් ඇයි ඒගෝන් රජ කරවන්න වලිකන්නෙ. වේරිස් තැනක කියනවා ඔහු සේවය කරන්නෙ රාජ්‍යයට පමණයි කියලා. ඔහු රාජ්‍යයට සේවය කරනවා නම් ඇයි ඒගෝන් වෙනුවෙන් රාජ්‍යය අස්ථාවර කරන්න උත්සහා කරන්නෙ. ඒගෝන් වගේ පිටින් කෙනෙක් සහ කුලී හමුදාවකින් රාජ්‍යයට සේවයක් වෙන්නෙ කොහොමද? උත්තරේ නම් ප්‍රතිපත්ති වලට එහා ගිය බැදීමක් එගොන් ගැන වේරිස්ට තියනවා. සරලව කිව්වොත් ලේ බැදීමක්. මේ බැදීම නිසා ඔහුට අවශ්‍යයි ඒගෝන් අයන් ත්‍රෝන් එකේ ඉදුවන්න.
කතාව ඉදිරියට කියන්න නම් බ්ලැක්ෆයර් පවුල සහ බ්ලැක්ෆයර් කැරලි ගැන දැනගන්න වෙනවා.(බ්ලැක්ෆයර් පවුල ගැන වැඩි විස්තර )
බ්ලැක්ෆයර් පවුල ආරම්භ කලේ ටාගේරියන් අවජාතකයෙක්. බ්ලැක්ෆයර් පවුල අයන් ත්‍රෝන් එකට අයිතිවාසිකම් කියමින් ටාගේරියන් පවුලට විරුද්ධව කැරලි ගැහුවා. මේ කැරලි වලදි බ්ලැක්ෆයර් පවුලේ සියළුම පුරුෂ උරුමක්කරුවන් මිය යනවා. හැබැයි ගැහැණු උරුමක්කරුවන් කිහිප දෙනෙක් ඉතිරි වෙනවා. තියරිය තමයි මේ ගැහැණු උරුමක්කරුවෙක්ගෙ පුතා තමයි ඒගෝන් ලෙස වෙස් වලාගෙන ඉන්නෙ. මේ ගැහැණු උරුමක්කරුවා විවාහ වෙලා ඉන්නෙ ඉලේරියෝ මොපාටිස් (මුල්ම සීසන් එකේ ඩැනි සහ විසේරිස් ඉන්න ගෙදර අයිතිකාරයා) සමග. ගැහැණු උරුමක්කරුවාගේ සහෝදරයා තමයි වේරිස්. ඉලේරියෝ සහ වේරිස්ට මේ ව්‍යාජ එගෝන්ව රජකරවන්න ඕන වෙන්නෙ මේ පවුල් බැදීම නිසයි. වේරිස් කොණ්ඩය භූ ගාන්නෙ ටාගේරියන් වරු වගේ කොණ්ඩයක් ඔහුට තියන නිසා ඒක වහන්න බව විශ්වාසයක් තියනවා. වේරිස්ට රාජකීය ලේ තියන එකට තවත් සාක්ෂියක් තමයි ඔහු කුඩා කාලයේ ලේ මැජික් සදහා ඔහුගේ ලිංග ඉන්ද්‍රියන් භාවිත කිරීම. (රාජකීය රුධිරය ලේ මැජික් කරන්න ඕන වෙනවා).
මේ ව්‍යාජ එගෝන්, බ්ලැක්ෆයර් වරයෙක් බවට තියන තවත් සාක්ෂියක් තමයි ඔහු සමග එන ගෝල්ඩන් කම්පණි කුලී හමුදාව. ගෝල්ඩන් කම්පණි කුලී හමුදාව ආරම්භ කලේ බ්ලැක්ෆයර් කැරලි සමයේ ටාගේරියන් අවජාතයෙක් විසින් ටාගේරියන් වරුන්ට එරෙහිවයි. එහෙම කුලී හමුදාවක් ටාගේරියන් වරයෙක් බලයට පත් කරන්න උදව් දේවි කියන එක හිතන්න අමාරුයි. නමුත් බ්ලැක්ෆයර් වරෙයෙක් බලයට පත් කරන්න ඔවුන් එක පයින් කැමති වෙනවා නොඅණුමානයි
ඉතින් ඩැනී දකින රූකඩ මකරාගෙන් නිරූපණය වෙන්නෙ වේරිස් රජ කරවන්න හදන ව්‍යාජ ටාගේරියන්වරයාවයි.



11). දුම් රො‍ටු නගින කණුවක පාෂාණ සතෙක් පියාපත් විදහා පාන අතර සෙවනැළි ගිණි පිඹියි.

[පාෂාණ සතාගෙන් නිරූපණය වන්නෙ ග්‍රේ ස්කේල් වැලදී ඇති ජෝන් කොනින්ග්ටන් නම් නයිට් වරයායි. ජෝන් කොනින්ටන් යනු ඒගෝන් ටාගේරියන්ගේ භාරකරු ලෙස කටයුතු කරන පුද්ගලයායි. මෙහි සෙවනැලි ගිනි යනුවෙන් අදහස් වන්නෙ ඒගෝන් ටාගේරියන් සැබෑ මකරකු නොව ව්‍යාජ සෙවනැලි මකරකු බවයි]


12) ඩෙනේරිස්ගේ අශ්වයා "සිල්වර්" තණ බිම් හරහා දිව ගොස් තාරකා සාගරක් යට අදුරු දිය කඩිත්තකට ගමන් කරන දර්ශනයක් ඇය දකිනවා
[ මෙයින් නිරූපණය වන්නේ ඩේනේරිස් හා කාල් ඩ්‍රෝගෝ ගේ විවාහ රාත්‍රියේ නවාතැන් ගත් ස්ථානයයි]

13) නිල් මලක් හිම තාප්පයක කඩතොලු අතරින් ලියලයි. මේ මල අවට පරිසරය නැවුම් සුවදකින් පුරවයි.

[ නිල් මල ලියානා ස්ටාර්ක් නිරූපණය කරනවා. හැරන්හෝල් තරගාවලිය ජය ගත් රේගාර් ටාගේරියන් නිල් රෝස වලින් නිමවපු ඔ‍ටුන්නක් ලියානාගේ හිසේ පළදවනවා. ඊට අමතරව වින්ටෆෙල්හි ලියානාගේ සොහොන් ගැබේ නිල් රෝස වලින් හදපු මල් මාලයක් පළදවා තියනවා. හිම තාප්පයේ කඩතොලු අතරින් පිපුණ නිල් මල, ලියානාගේ දරුවා වන ජෝන් ස්නෝව් නිරූපණය කරනවා.
පොතේ පාඨකයන් ජෝන් ස්නෝව් ගේ දෙමව්පියන් නිවැරදිව අනුමාන කිරිමට ඩැනී දු‍ටු මේ දර්ශනය උදව් කරගෙන තියෙනවා.]



14) අවලස්සන සෙවනැලි කුඩාරමක් තුල කැරකෙමින් නර්තනයේ යෙදෙනවා ඩෙනේරිස් දකියි

[ මෙය කාල් ඩ්‍රෝගෝ සුවපත් කිරීමට යක්දෙස්සිය කල රුධිර මායා පූජාව නිරූපණය කරනවා



15) ඊළගට ඩැනී දකින්නේ ඩ්‍රෝගෝට වෙදකම් කිරීමට ඉදිරිපත් වූ යක්දෙස්සිය ගිනි ගෙන දැවෙන දර්ශනයක්. ගිනි දැල් අතරින් මකරුන් උපදිනවා


16) රිදී අශ්වයෙක් පි‍ටුපස නිරුවත් මළ සිරුරක් ඇද ගෙන යන දර්ශනයක්

[ මෙය ඩැනීට වස දීමට තැත් කල වයින් වෙළෙන්දාට දුන් දඩුවමයි. ඔහු මිය යනතුරු ඩෙනේරිස්ගේ රිදී පැහැ අශ්වයාගෙ පි‍ටුපසින් ගැට ගසා ඇවිදින්නට සැලැස්සුවා]


17) ඊළගට සුදු පැහැති සිංහයෙක් තණබිම් හරහා දුවන දර්ශනයක් ඩැනී දකිනවා

මෙයින් බොහෝ විට නිරූපණය වන්නේ ජේමි ලැනිස්ටර් විය හැකියි. ලැනිස්ටර් පවුලේ ලාංඡනය සිංහයා වීමත්, ජේමි රජුගේ ආරක්ෂකයන් පළදින සුදු පැහැදි ශරීරාවරණ පැලදීම මීට හේතුවයි.



18) කදු මාතාව අබියස, විලකින් ගොඩට එන නිරුවත් මැහැල්ලන් ඩෙනේරිස් ඉදිරියේ දණ නවයි. සුදු හිසකෙස් ඇති ඔවුන්ගේ ඔළු පහලට බර වී ඇත

[ මෙය කදු මාතාව අභියස හෙවත් ඩොත්‍රාකි ශුද්ධ භූමියේදී ඩෙනේරිස් විසින් සියළුම කාල්වරු මරා දැමීමෙන් පසු ඩොෂ් කලීන් පූජකවරියන් ඇය ඉදිරියේ දණ නමන සිදුවීමයි]



19) දස දහසක් වහලුන් තමන්ගේ ලේ වැකි අත් වලින් ඩෙනේරිස්ව ස්පර්ෂ කිරීමට ඉදිරියට පැමිණේ. ඔවුනේ මුවින් " අම්මා" ලෙස හඩ නගයි.

[මෙය යුන්කායි නගරයේ වහලුන් නිදහස් කිරීම නිරූපණය කරන දර්ශනයයි]


Tuesday, August 8, 2017

ගේම් ඔෆ් ත්‍රෝන්ස් කොහොම ඉවර වෙයිද?


දැන් උඹලා හිතාගෙන ඉන්නේ ඩෙනෙරිස්සුයි ජෝනුයි  එකතු වෙලා ඔක්කොම සතුරෝ විනාස කරලා වයිට් වෝකර්ස්ලව මරලා උන් දෙන්නා බැදලා සදාකල් සතුටින් ජීවත් වේවි කියද? නෑ මිත්‍ර වරුනි. ඔය වගේ predictable කලු සුදු හොද නරක ඉරක් ගහලා වෙන් කරන චරිත වලට ජොර්ජ් මාටින් සීයා කැමති නෑ. ඊට වඩා වැඩේ සංකීර්ණයි. එහෙනම් කලු සුදු චරිත වලට අකමැති මාටින් සීයා තනිකරම දුෂ්ඨ චරිත වන වයිට් වෝකර්ස්ලාව නිර්මාණය කලේ ඇයි? උත්තරේ වයිට් වෝකර්ස්ලා සම්පූර්ණයෙන්ම දුෂ්ඨ චරිත නෙවෙයි. ඔවුන්ව වනාතරයේ දරුවන් විසින් නිර්මාණය කලේ ආයුධයක් විදිහට. වයිට් වෝකර්ස්ලා පණ තියන බුද්ධිමත් ජීවී කොට්ඨාසයක්. උන්ට ඔවුන්ගෙම භාෂාවක් තියනවා. වයිට් වෝකර්ස්ලා එක්ක සාමයෙන් ජීවත් වෙන්න පුළුවන් බව ක්රෑස්ටර් (දුවලා එක්ක ඩිස්ටි ඩිඩිං කරලා හම්බවෙන පිරිමි ළමයි වයිට් වෝකර්ස්ලාට බිලි දෙන පොර) පෙන්නලා දීලා තියනවා


අන්තිම වතාවේ දීර්ඝ රාත්‍රියේ (Long night) වයිට් වෝකර්ස්ලා ආක්‍රමණය කල වෙලාවෙ මිනිසුන් සහ වයිට් වෝකර්ස්ලා අතර යුද්ධය දිනලා අවසන් කරලා තියෙන්නේ ගිනි ගෙන දැවෙන අසිපතක් අතින් ගත්ත azor ahai විසින්. ඒත් ඇත්තටම එහෙමද වුනේ. මේ සිද්ධි පොත් වල ලියවිලා තියෙන්නේ අවුරුදු දහස් ගාණකට පස්සේ කට කතා වගේ මූලාශ්‍ර වලින්. azor ahai කියන්නෙ පුරා වෘත්තයක්. මුල් වතාවේ මිනිසුන් සහ වයිට් වෝකර්ස්ලා අතර යුද්ධය අවසන් වුනේ එකගතාවයකින් වෙන්න පුළුවන්. වයිට් වෝකර්ස්ලා දැන් දකුණ ආක්‍රමණය කරන්නේ ඒ එකගතාවයේ කොන්දේසි මිනිස්සු කඩ කල නිසා වෙන්න පුළුවන්.

ජෝර්ජ් මාටින් සීයා යුධ විරෝධියෙක්. ඔහු වියට්නාම යුද්ධයට සහභාගී වීම ප්‍රතික්ෂේප කල කෙනෙක්. ඊට අමතර මුළු සීරීස් එකේ රොබ්, ස්ටැනිස්, ඩැනේරිස් වගේ අවංක අදහස් තියන අය දියත් කරපු යුද්ධ අවසන් වුනේ හැමෝම දුක්ඛිත තත්වයට වැටිලා; යුද්ධය දියත් කරපු අරමුණු බිද වැටිලා තමයි ගැටුම් අවසන් වුනේ. ඉතින් මේ වතාවේ වයිට් වෝකර්ස්ලා සහ මිනිස්සු අතර ඇති වන යුද්ධයකින් සියළු ප්‍රශ්න විසදේවි කියන එක තර්කානුකූල නෑ. වයිට් වෝකර් ප්‍රශ්නය අන්තිමට විසදෙන්නේ වයිට් වෝකර්ස්ලා සහ මිනිස්සු අතර එකගතාවයකින් කියලා උපකල්පනය කරන්න පුළුවන්. මේ එකගතාවය ඇති කරන්න හොදම මිනිහෙක් ඉන්නවා. ඒ තමයි ජෝන් ස්නෝව්. ජෝන්ට එකගතා ඇති කර ගන්න පලපුරුද්ද තියනවා. වයිල්ඩ් ලින්ග් ලා එක්ක ඇති කර ගත්ත එකගතාව හොදම උදාහරණයක්.

Sunday, May 3, 2015

ලිංගික සුළුතරයද මනුෂ්‍යයෝ වෙති.



මැයි දින ‍රැළි ගැන මට උනන්දුවක් නැත. පක්ෂ වල බල පුළුවන් කාරකම් පෙන්නනවා මිසක පොදු මහජනයාට ප්‍රතිලාභයක් ලැබෙන කටයුත්තක් නොවේ. 

මෙය ලියන්න හිතුනේ එක්සත් ජාතික පක්ෂයේ ‍රැළියට සහභාගී වී සිටි cross-dressers හෝ වෙනත් ලිංගික සුළුතරයකට අයත් පිරිසකගේ වීඩීයෝවක් එක්සත් ජාතික පක්ෂයට අපහාස කිරීමෙ අරමුණින් බෙදා හැරීම දු‍ටු නිසයි. එජාපයට අපහාස කිරීමට අවශ්‍ය නම් පක්ෂයේ නායකයන්ගේ වංචා දූෂණ මිනීමැරුම් මැරක්‍රියා යොදා ගැනීම සිදු කරන්න. ලිංගික සුළුතරයකට අයත් පිරිස් වල මානව ගෞරවය බිල්ලට දැමීම සිදු නොකරන්න. එළඹෙන වෙසක් පොහොය දිනයේ සියළු මනුෂ්‍ය වර්ගයා කෙරෙහි මැදිහත් සිතින් ඔවුන්ට හිමි අභිමානය ලබා දීමට උත්සහ ගන්න



තෙරුනේ නැති අයට පෝය දවසේ අහන්න බණක් පහලින්


Friday, March 6, 2015

සමන්තබද්‍ර Vs මහනායක || Lesser of two evils


මම කිසිදු භික්ෂුවගේ අනුගාමිකයෙක් නොවෙමි. විශේෂශයෙන්ම සමන්ත්‍රබද්‍ර භික්ශුවගේ අනුගාමිකයෙක් නොවෙන්නේ පර්සනැලිට් කල්ට් දු‍ටු සැනින් අප්‍රිය වන බැවිනි.

ඒත් සමන්ත්‍රබද්‍ර සහ
මහනායක හිමිවරු අතර වාදයක් පැවත්වුවොත් මහනායකලා හොම්බෙන් යන බව කියන්න ඕනෙ.

සමන්ත්‍රබද්‍රගේ රහත් බාවය කිසිවෙකුට කිරා මැන බලා තහවුරු කල නොහැක. බෞද්ධ භික්ෂුවක් තමන් රහත් බව පාරම් බෑමට නොසුදුසු වුවත් බුද්ධ සාසනය තුල එය තහනම් නැත .


සම්න්ත්‍රබද්‍රගේ මස් කෑම, හැදි ගැරප්පු බාවිතය, ටීෂර්ට් ඇදීමට කරන අභියෝග ඉතා පහසුවෙන් තර්ක කොට බිඳ දැමිය හැක.

ඒත් මහනායක වරුන් පවත්වාගෙන යන කුල වංශ සම්ප්‍රධාය එලියට ඇද්දොත් එයින් බුද්ධ සාසනයේ පදනමටම පහර වදින බව පෙන්වා වැඩි හානිය කරන්නේ මහනායක හිමිවරු බව පහසුවෙන් සාධනය කල හැක

Wednesday, January 29, 2014

මානව හිමිකම් සහ දේශපාලන ක්‍රීඩාව




හිටපු ඊශ්‍රායල අගමැති ඒරියල් ෂැරෝන් පහුගිය දිනක අභාවයට පත් විය. 1953 දී ඊශ්‍රායල හමුදාව විසින් සිදු කරන ලද කුප්‍රකට කිබියා ගම්මාන සංහාරයට අණ දුන්නේ එවකට හමුදා නිළධාරියකුව සිටි ඒරියල් ෂැරෝන් බව සඳහන් වේ. ඊට අමතරව සරණාගත කඳවුරු ආශ්‍රිතව කරන ලද යුධ අපරාධද ඔහුගේ ගිණුමට බැරවී තිබේ.

ජනාධිපති ඔබාමා බලයට පත්වූ විගස වසා දමනවා යැයි කියූ ගුවන්තනමෝ බේ සිරකඳවුර ඉවත් කිරීමට මේ වනතෙක් අසමත් වී තිබේ.

ලෝකය සර්ව සාධාරණ ස්ථානයක් නොවේ. ලංකාවේ යුධ අපරාධ වලට එල්ල වන ප්‍රතිරෝධය ඒරියල් ෂැරෝන්ලාට, නේටෝ වැනි සංවිධාන වලට එල්ල වන්නේ ඉතා අවම වශයෙනි.  එක්සත් ජාතීන්ගේ සංවිධානය හරහා ඊශ්‍රායලයට විරුද්ධව කොපමණ ක්‍රියාමාර්ග ගත්තද ඊශ්‍රායලය ඒවා සතපහකට වත් ගණන් ගන්නේ නැත. ඊට එක් හෙතුවක් නම් ඊශ්‍රායලය යනු ආර්ථික, සමාජීය සහ හමුදාම වශයෙන් ඉතා ශක්තිමත් රටක් වන බැවිනි. අනෙක් හෙතුව නම එරට වෙනුවෙන් පෙනී සිටින ඇමරිකාව බඳු බලවත් රාජ්‍යයන් තිබීමය. ඉහත වාසි දෙකම ලංකාවට නැත. දේශපාලන ක්‍රීඩාවේ හැටි එහෙමය. 

ලංකාව කල යුත්තේ පිටියේ ස්වභාවය අවබෝධ කරගෙන ක්‍රීඩා කීරීම මිස අසාධාරණ වුවත් විනිසුරුවන්ට අභියෝග කිරීම නොවේ. සිංහලෙන් බෝඩ් අල්ලගෙන තානාපති කාර්යාල වැටලීම වැනි වැඩ නිරර්ථක ක්‍රියාවන් වේ.

දේශපාලනය පසෙකින් තබා මානුෂිකව සිතුවොත් ලංකාවේ පමණක් නොව ලොව සියළු තැන සිදුවන මනුෂ්‍යත්වයට එරෙහි අපරාධ වලට වගකිව යුත්තෝ යුක්තිය ඉදිරියට ගෙන ආ . යුතුය. උදාහරණයක් ලෙස බාලචන්ද්‍රන් ඝාතනය සාපරාධී ක්‍රියාවකි. ඉහිරුනු කිරට හඬා පලක් නැත. දැන්  කල යුත්තේ ඩැමේජ් කන්ට්‍රෝල් කිරිමය. රටක මිලිටරිය යනු සර්ව සම්පූර්ණ ආයතනයක් නොවේ. එහිද අතපසු වීම් වැරදි සිදුවේ. මිලිටරියක් අතින් වැරදි සිදුවන විට එයට වන්දි ගෙවන්න වෙන්නේ මිනිස් ජීවත වලනි. අවම වශයෙන් බාලචන්ද්‍රන්ගේ සිද්ධියට සම්බන්ධ ක්ෂේත්‍රයේ සිටි හමුදා නිළධාරියාට එරෙහිව නීතිමය ක්‍රියාමාර්ග ගත යුතු බව මගේ පෞද්ගලික හැඟීමයි.

දෙවන ලෝක යුධ සමයේ ලෝකය අත්දු‍ටු අපරාධ නිසාම වර්තමානයෙදී මානව හිමිකම් වලට විශේෂ අවධානයක් යොමු වී තිබේ.
  
 මානව හිමිකම් යනු ද්‍රෝහින්ගේ මාතෘකාවක් නොවේ. මානව හිමිකම් ගැන කතා කරන්නේ ද්‍රෝහීන් පමණක් නම් ලොකුම ද්‍රෝහියා මහින්ද රාජපක්ෂය. මානව හිමිකම් යනු ඔබෙත් මගෙත් අභිමානය ‍රැකගෙන මෙලොව ජීවත් වීමේ අයිතියයි.

ආණ්ඩුව මානව හිමිකම් ප්‍රශ්නයේදී මුලින්ම කල වරද නම් "සීරෝ සිවිලියන් කැෂුවල්ටි" කියා ලොකු පුරසාරමක් දෙඩීමය. එහෙම යුද්ධ ලෝකයේ සිද්ධ වෙනවා නම් ඒ ඉතා අල්ප වශයෙනි. දැන් රජය කල යුත්තේ කොටි සංවිධානය නිසා තමන්ගේ ජීවිත වලට තර්ජන ඇතිවූ සමාජ කොටස් වල දුක් ගැනවිල්ල ජාත්‍යන්තරයට ගෙන යාමය. මට බලය තිබෙනවා නම් මම කරන්නේ නාසි යුධ අපරාධ කරුවකු වන අයික්මාන්ට කලා වගේ කේපීව දීර්ඝ නඩු විභාගයකට යටත් කිරීමය. විත්තිකාරයෝ ගෙන්නලා කැමරා ඉස්සරහ අඬවලා ජාත්‍යන්තරයට හොඳ ෂෝ එකක් බලන්න දෙන එකය.

Tuesday, January 28, 2014

පත්තර කියවන්නේ කව්ද || Who reads the papers?



ජුනි මාසේ කතන්දරකාරයාගේ පොස්ට් එකක කියලා තිබුනා පත්තර වල ලියවෙන්නේ පත්තරේ අයිතිකාරයාට ඕන දේවල් බව. ඒක කියවද්දි මට මතක් වුනේ පත්තර කියවන්නේ කවුද කියලා යස් මිනිස්ටර් (Yes Minister) කතා මාලාවේ අගමැතිතුමා, අගමැති ලේකම් සහ ඔහුගේ පෞද්ගලික ලේකම් අතර ඇතිවන සංවාදයක්

අගමැති : පත්තර ගැන මට කියන්න එන්න එපා. ඔය පත්තර කියවන්නේ කවුද කියලා මම හරියටම දන්නවා

ඩෙලි මිරර් කියවන්නේ තමන් රට පාලනය කරන බව හිතන් ඉන්න කට්ටිය

ගාර්ඩියන් කියවන්නේ රට පාලනය කල යුත්තේ තමන් බව හිතන කට්ටිය

ටයිම්ස් පත්තරේ කියවන්නේ ඇත්තටම රට පාලනය කරන කට්ටිය
ඩෙලිමේල් කියවන්නේ ආණ්ඩු කරන අයගේ නෝනලා

ෆයනෑන්ෂල් ටයිම්ස් කියවන්නේ රට අයිති කරන් ඉන්න කට්ටිය

මොර්නින්ග් ස්ටාර් කියවන්නේ රට, වෙනත් රටක් විසින් පාලනය කල යුතුයි හිතන කියලා කට්ටිය

ඩේලි ටෙලිග්‍රාෆ්  කියවන අය හිතන් ඉන්නේ ඇත්තටම රට පාලනය කරන්නේ වෙන රටක් බව.


අගමැති ලේකම්: එතකොට අගමැතිතුමා සන් පත්තරේ කියවන්නේ කවුද?

(පෞද්ගලික ලේකම් බාධා කරයි)

පෞද්ගලික ලේකම් කවුරු රට පාලනය කලත් සන් පත්තරේ කියවන අයට වැඩක් නෑ. ඒ ගොල්ලන්ට වැදගත් වෙන්නේ තුන්වෙනි පි‍ටුවේ ඉන්න කෙල්ලගේ පියයුරු ලොකුද කියන එක විතරයි





එංගලන්තේ පත්තර සහ ලංකාවේ මාධ්‍ය අතර වැඩි වෙනසක් නැත .

ලංකාදීප, දිනමිණ, දිවයින, සී නිවුස්, ඊ නිව්ස්, The Nation, Colombo Telegraph වැනි මාධ්‍ය කියවන අය  ඉහත තමන් කැමති කැටගරියකට දා ගත හැක